Sá dásamlegi tími er runninn upp í norskri umferðarmenningu að flestir Norðmenn eru farnir í sumarfrí. Þetta táknar að um það bil einn og hálfan mánuð á ári, frá byrjun júlí fram í miðjan ágúst, kemst maður leiðar sinnar á vegum hérlendis.
Myndin hér til hægri er tekin klukkan 16:08 föstudaginn 5. júlí á Tanangervegen, þjóðvegi 509 milli Sola og Sandnes. Svona útsýni er óhugsandi að fá nema í fellesferien eins og það er kallað, nánast auður vegur síðdegis á virkum degi. Svo illt er ástandið afganginn af árinu að ég sit gjarnan og les í vinnunni til 16:45 og ek þá heim á leið til að sleppa við að hanga í allt að einn og hálfan tíma í röð og brenna upp hálfan tank af bensíni fyrir ekki neitt.
Að þessu leyti finnst mér ósköp þægilegt að fara seint í sumarfrí og vera að vinna mestan hluta þess tíma sem hinn dæmigerði Norðmaður er í fríi, ég kemst til og frá vinnu eins og ekkert sé sjálfsagðara. Tvær vikur á veturna fær maður svo að njóta sama lúxus, eina að hausti og eina að vori, þegar haust- og vorfríin eru í grunnskólunum og flestir Norðmenn taka sér frí frá vinnu til að hanga heima og gera ekki neitt með vesalings börnunum.
(MYND: Frábær kvöldstund eftir gönguferð um suðrænar perlur norskrar náttúru í Sør-Hidle í gær. F.v. og í U: Erla Þorsteinsdóttir tengdamamma, James Norbert Robertson hennar maður, Ásgeir, Rósa, ég, Unnur og Sigurbjörn. Væntanlega tekur ein gengilbeinanna myndina, aðrir eru á henni.)
Helgin fram að þessu hefur verið frábær, glampandi sól og 20+ gráða hiti. Tengdamamma og hennar maður eru í heimsókn í tvær vikur og við fórum með þau í siglingu í gær út í Sør-Hidle þar sem við nutum fagurrar náttúru og alls þess besta sem veitingahúsið Flor og Fjære og kolgeðveiki hollenski kokkurinn þeirra hafa upp á að bjóða. Með í för voru Ásgeir, Sigurbjörn og Unnur. Frábært kvöld með öllu, ég vísa í tugi mynda úr smiðju Sigurbjörns Bjarnasonar á Facebook-síðu minni fyrir þá lesendur sem eru þar og bið þá lesendur sem ekki eru þar afsökunar en það var viðbúið að mynd- og lesefni hér tæki að lokum að líða fyrir veru mína á bókinni þar sem mun auðveldara er að leggja fram myndefni án þess að hafa langan texta til að bera það uppi. Einn takki sem gerir allt eins og Steve Jobs heitinn dreymdi um.
Follow