Dýravinir landsins (og án efa fleiri) standa höggdofa gagnvart fréttum af aldurhniginni schäfer-tík, Lady, sem var urðuð lifandi við smábátahöfnina í Kópavogi rétt fyrir helgi. Engin takmörk virðast vera fyrir því hvað veitir geðtrufluðum einstaklingum ánægju, þess sáust fjölmörg dæmi víða og oft. Þyngd þeirra steina sem notaðir voru við ódæðið þykir bera þess vitni að fullorðið, eða að minnsta kosti stálpað, fólk hafi verið að verki. Það eykur enn á hryllinginn. (MYND: Af Facebook (ég er ekki á Facebook, fékk myndina lánaða frá Vísi))
Blessað dýrið er greinilega klettur, lifði þetta af og er auk þess 19 ára sem mér skilst að samsvari 133 mannsárum miðað við þumalputtaregluna um að eitt ár einstaklings af tegundinni canis familiaris jafngildi sjö árum manna. Nú er spurning hvernig öryggisgæslu við smábátahöfnina í Kópavogi sé háttað og hvort þar séu myndavélar eða eitthvað annað sem nota má til að greina mannaferðir á svæðinu. Ljóst er að þeir sem þarna voru að verki munu ekki eiga sjö dagana sæla komist það í hámæli hverjir þar fóru. Að minnsta kosti ef miðað er við hitann í fólki þegar talið var að nokkrir ungir menn hefðu sálgað hundinum Lúkasi á Eimskipsplaninu á Akureyri aðfaranótt 17. júní 2007. Talið er að aldrei hafi einn Íslendingur tekið á móti fleiri líflátshótunum en Helgi Rafn Brynjarsson sem af einhverjum ástæðum var sakaður um að hafa átt þar hlut að máli.
Helgi Rafn reyndist hins vegar saklaus og málið í heild sinni tómur uppspuni en Lúkas gekk rækilega í endurnýjun lífdaganna þegar hann fannst við hestaheilsu (geti hundur verið það) nokkrum dögum síðar.
Fjölmiðlaumfjöllun í Kópavogsmálinu er allrar athygli verð. Fréttin birtist fyrst á Hvuttar.net í gær, föstudag, sama dag og Lady fannst og var skilað til eigenda sinna. Landpósturinn, fréttavefur fjölmiðlafræðinema við Háskólann á Akureyri, skúbbar fréttinni og er fyrstur með hana af þeim miðlum sem flokka má sem fréttamiðla (Hvuttar.net er áhugamannavefur um hunda og hundahald að mínu viti). Þetta er býsna gott framtak hjá Landpóstinum og ég sendi þeim góða kveðju fyrir hönd MA-nema í blaða- og fréttamennsku við Háskóla Íslands.
atlisteinn.is skorar á lögregluna á höfuðborgarsvæðinu að setja Lady-málið ofarlega í bunkann og hafa hendur í hári þeirra sem þarna voru á ferð sé þess nokkur kostur. Siðblindan er algjör geti fólk framkvæmt verknað á borð við þennan og hvaða fórnarlömb verða þá fyrir barðinu á því næst? Maður spyr sig.
Follow