Vissulega er gert ráð fyrir því að atlisteinn.is velji mann ársins® nálægt áramótum, þegar viðkomandi ár liggur þokkalega fyrir. Reglur vefsetursins mæla þó fyrir um að framkvæmi einhver einstaklingur, lífs eða liðinn, svo mikilfenglegan verknað eða afrek að hafi víðtæk áhrif á líf, hamingju og/eða afkomu milljóna, ellegar að orð, gjörðir, lífsskoðun eða athafnir viðkomandi hafi svo djúpstæða merkingu eða afgerandi svölun sannleiksþorsta fyrir mannkynið allt að réttlæti hreina og klára útnefningu til og viðurkenningu á nafnbótinni maður ársins á atlisteinn.is, teljist valið fullnægjandi og að lögum. (MYND: Stolið af andri.blog.is án hiks)
Í fyrsta sinn í fjögurra mánaða sögu atlisteinn.is hefur þetta nú gerst. Fimmtudaginn 28. maí 2009 steig ungur og framsækinn fréttahaukur 365 miðla fram í dagsljósið og lagði, í orðsins fyllstu merkingu, á borðið hlut sem enginn maður hefur áður séð, skynjað eða þreifað á – sinn eigin ristil!
Af hispurslausri einlægni, hlutlægni, sannleiksfýsn og með ekkert annað en þekkingu, hag og hamingju almennings að leiðarljósi lýsti Andri hvort tveggja með orðum og sýndi með lifandi myndum innrás í og hreinsun á líffærinu. Dómnefnd atlisteinn.is verður ekki oft orðs vant en fyrstu orðin sem hrutu í einum kór fram af vörum nefndarinnar, sem reyndar er aðeins skipuð einum einstaklingi, voru eðlilega úr heilagri ritningu: Andri Ólafsson, dýrðlegur er ávöxtur kviðar þíns. Og að sönnu gæti Andri þá viðhaft orð meyjarinnar til bónda síns, kvöldið er komið var að því að hún fæddi heimsbyggðinni sveinbarn sitt: ‘Já, bóndi minn, og ég mun brátt verða léttari.’
Andri Ólafsson, þér hefur hér með verið veitt nafnbótin maður ársins 2009 á atlisteinn.is®. Titill sem allþarfr er ýta sonum en óþarfr jötna sonum. Heill sá er kvað, heill sá er kann, njóti sá er nam, heilir þeir er hlýddu. Og þeirra allra heilastr, ristill þinn hinn bjarti, meðan moldir og menn lifa.
Follow