Ég votta Frjálsa fjárfestingarbankanum og fleiri glæpafyrirtækjum innilegustu samúð með ólögmæti myntkörfulána þeirra. Það hlýtur að vera mikið áfall þegar lánveitandi verður fyrir því að lán sem (í mínu tilfelli) hækkaði um 77.000 krónur á dag í 16 mánuði samfleytt er dæmt ólöglegt af einhverjum Hæstarétti. Aldrei má maður ekki neitt, eins og einhver söng í kunnu dægurlagi.
Ekki var starfsfólk Frjálsa fjárfestingarbankans beinlínis við alþýðuskap þegar maður leit svo inn hjá þeim og fór fram á svonefnda frystingu lánsins, örfáum dögum eftir að stjórnvöld landsins höfðu mælst til þess að lánastofnanir veittu lántakendum slíka þjónustu. ‘Þú getur alveg sótt um en við munum segja nei,’ sagði þjónustufulltrúinn hjá Frjálsa, nánast annars hugar, og hafði augljóslega áhyggjur af merkilegri hlutum í lífinu en láninu mínu sem fór úr 17,2 í 40 milljónir á örfáum mánuðum. Þetta kallar maður nú frjálslegan fjárfestingarbanka, hálfsorglegt að þeir urðu svo gjaldþrota greyin litlu. Það verður verulega leiðinlegt ef bílalánafyrirtækin færu á hausinn líka, þau sem voru að græða á tá og fingri á margföldum höfuðstólum sínum. Hvar er réttlætið í þessum dómi Hæstaréttar verð ég að spyrja.
Veðurfar á þjóðhátíðardegi Íslendinga er stórmerkilegt. Dagurinn er þekktur fyrir rok og hellirigningu…nema á ártölum sem enda á 0 og 5. Þannig man ég eftir einmuna veðurblíðu og steikjandi sól 17. júní 1995, 2000 og 2005 og samkvæmt fréttum hins háa Ríkisútvarps í kvöld hefur veðrið leikið við landsmenn í dag. Tilviljun? Það er alveg á mörkunum. Hér var líka fínt veður í dag en ég var auðvitað í vinnunni og á námskeiði fram á kvöld. Auk þess misstum við af þjóðhátíðarfögnuði Íslendingafélagsins hér þar sem við vorum fyrst að fá upplýsingar um hvar heimasíðu þess væri að finna núna fyrir klukkutíma. Félagið heitir þá auðvitað Island-Norge en ekki Íslendingafélagið í Stavanger eða Félag Íslendinga í Stavanger. Hins vegar heita samsvarandi félög í Ósló og Björgvin slíkum hefðbundnum nöfnum. Varla er hægt að treysta á neitt á þessum síðustu og verstu…og síst blessuð myntkörfulánin.
Niðurstaða úr skriflegu prófi mínu á öryggis- og dyravarðanámskeiði PSS, þar sem ég leitaði hófanna um aukavinnu, liggur fyrir. Ég náði prófinu og framkvæmdastjórinn sagði mér að auki að ekkert í úrlausninni benti til annars en að próftaki væri Norðmaður í húð og hár og hvað væri ég að væla. Sannleikurinn er þó í raun sá að ég skrifa mun betri norsku en ég tala þar sem allar starfsumsóknir og erindi sem send voru hingað frá Íslandi tímabilið desember til apríl síðastliðinn voru á norsku, hvað svo sem það tók mig langan tíma að koma þeim saman. Sú kvöl nýttist mér svo við prófborðið á miðvikudaginn í síðustu viku. Næst tekur við starfsþjálfun hjá PSS og verði ég nægilega óheppinn gæti hún meðal annars falist í því að taka þátt í öryggisgæslu á tónleikum Snoop Dogg svokallaðs á miðvikudaginn í næstu viku.
Follow