…það er kominn 17. júní. Einhvern veginn þannig hljómar gömul íslensk barnagæla og það verður engu logið um það að laugardagskvöldið 19. júní var haldin allt að því satanísk þjóðhátíðarveisla í Ålgård sem er Íslendinganýlendan hér á Stafangurssvæðinu. Það var engin önnur en hún Jóna Líf, sem er mér og fleirum að góðu einu kunn frá því í strippbransanum í gamla daga, sem opnaði dyr sínar og bauð íslenska landsliðinu í sukki og ólifnaði upp á grill og stífa drykkju í sínum fagra garði í einmuna veðurblíðu. Það litla sem ég man af gærkvöldinu var mjög ánægjulegt. (MYND: Dömur dauðans, Bergljót, Rósa og Jóna Líf.)
Við sýndum þó enga miskunn í dag og fórum og skoðuðum tveggja hæða íbúð í raðhúsi við hliðina á okkar ágæta vinnustað, háskólasjúkrahúsinu. Þetta virtist bara vera hinn ágætasti bústaður og fyrsta íbúðin þar sem ég finn minnst fimm metra langan gluggalausan vegg sem hentar mínum eldforna bókaskáp. Íbúðin er 90 fermetrar á tveimur hæðum með svölum og garði, sem sagt öllu sem brennivínsþyrstir Íslendingar þurfa á að halda í lífi sínu. Við tjáðum leigusölunum að við hefðum verulegan áhuga og bíðum nú svars. Satt að segja erum við töluvert spennt. (MYND: Gestur Benedikt Guðmundsson. Drekktu þennan skratta undir borðið og þú verður boðaður/boðuð til Stokkhólms í desember af sænsku Nóbelsverðlaunaakademíunni.)
Deginum í dag eyddum við að öðru leyti í að þamba rauðvín á ýmsum börum niðri í bæ í 20 stiga hita og mikilli veðurblíðu. Þar vorum við svo stálheppin að rekast á tvífara Stefáns Karls Stefánssonar leikara sem reyndist vera frá Montpellier í Frakklandi. ‘Really? I didn’t know that,’ voru viðbrögð hans þegar honum var tjáð að íslenskur leikari væri tvífari hans. Hvernig hefði hann svo sem átt að vita það? Meiri hálfvitarnir þessir Frakkar. (MYND: Franskur tvífari Glanna glæps. Er einhver ósammála mér?)
Follow