Yfirvöld fangelsismála á Íslandi tóku í dag skref sem er stærra en fyrsta skref Neil Armstrong á tunglinu 21. júlí 1969. Þau tóku þá ákvörðun að vefsetur sannleikans, atlisteinn.is, annaðist veislustjórn á árshátíð íslenskra fangelsisyfirvalda á vorjafndægri, 21. mars 2009. Á myndinni hér við hliðina á sést Páll Winkel fangelsismálastjóri ræða við Guðbjörn Guðbjörnsson sem er um þessar mundir að blanda sér í prófkjörsslag vorsins.
Vissulega er hér um ákveðna tegund samfélagsþjónustu að ræða og mun atlisteinn.is ekki skorast undan enda er vefsetrinu ekkert mannlegt óviðkomandi (jæja, fátt alla vega). Það er skemmtilegt að stofnun fangelsismála skuli velja 21. mars sem árhátíðardag. Það var 20. mars 1759 sem gefinn var út konungsúrskurður um byggingu tugthúss á Íslandi. Framkvæmdir hófust þó ekki fyrr en árið 1761 og það voru engir Pólverjar sem byggðu fyrsta hegningarhúsið. Það voru auðvitað fangarnir sjálfir. Þeir grófu grunninn og drógu grjót að rétt eins og verkmenn þeir er byggðu hina egypsku píramýda nokkrum árþúsundum áður.
Danir teiknuðu fyrsta íslenska fangelsið eins og margar merkisbyggingar hér enda er það engin tilviljun að núverandi fangelsismálastjóri er hálfur Dani. Það eina sem vantar er hinn helmingurinn enda er hann frekar lágvaxinn. Fjöldi fanga í fyrsta íslenska fangelsinu takmarkaðist við tíu. Seinna urðu hinir og þessir merkismenn fangar þar, til dæmis Geir H. Haarde sem nýlega lauk afplánun.
Þar sem bílar voru fáir á landinu árið 1760 voru fangar lítið í því að búa til númeraplötur en fengust þeim mun meira við ullarvinnslu og voru einnig nokkuð til sjós. Þó er ein númeraplata varðveitt á þjóðminjasafni og ber áletrunina HAARD-1. Hún náði þó aldrei svo langt að komast á bifreið enda fyrsta bifreiðin ekki komin til landsins. Fræðimenn greinir á um merkingu áletrunarinnar en marga grunar að henni sé snúið upp á ensku og tákni í raun (The) Haard-one sem er augljós skírskotun til norskættaða forsætisráðherrans. Allt þetta og miklu meira í Borgartúninu 21. mars…
Follow