Eins og ég átti satanískan dag yfir ritgerðinni í gær var dagurinn í dag jafn-ánægjulegur. Sama daginn fengum við leigjendur að húsinu okkar og fengum sjálf leiguíbúð í Forus-hverfinu í Stavanger, fimm kílómetra frá væntanlegum vinnustað okkar, rafmagn, nettenging og sjónvarp innifalið í leigu sem er 9.000 norskar á mánuði. Þetta steinliggur! Sú íbúð verður þó aðeins til bráðabirgða og þar munum við búa til 1. september. Búslóðin verður í geymslu skammt frá á meðan. Í sumar bíður okkar svo það verkefni að finna út hvar við höfum áhuga á að búa til frambúðar og finna íbúð sem rúmar alla okkar búslóð, þar með taldar 10.000 bækur. Einhver rannsóknarblaðamennska fer í það. (MYND: Fjörið er byrjað…og bara tvö ár síðan ég flutti síðast!)
Núna er martröð búslóðapakkningar hafin og við erum hér kófsveitt með fleiri búnt af kössum úr Kassagerðinni að ganga frá bókasafninu. Hingað kemur gámur frá Eimskip 30. apríl og fer héðan aftur að morgni 4. maí til að ná á skipsfjöl fyrir 6. maí sem er brottfarardagur búslóðar. Hvenær verður hægt að senda búslóðir í tölvupósti?!? Fram að því ætlum við að reyna að pakka sem flestu, selja þau húsgögn sem til stendur að selja og fara átta milljón ferðir á Sorpu með dót sem á að henda. Þetta verður hálfasnaleg vika, 4. – 11. maí, áður en við fljúgum sjálf út. Við munum sitja uppi í galtómu húsi eins og eitthvert hústökufólk og meira að segja rúmið verður einhvers staðar úti á ballarhafi á leið til Noregs! Líklega munum við sofa hangandi í burðarbitum eins og leðurblökur. Ég get ekki beðið.
Það er ekki hægt að neita því að það er mikil tilhlökkun í loftinu að komast af þessum spillta öskuhaug. Það kom mér á óvart (og samt ekki) að hlusta á fyrri símatíma Reykjavíkur síðdegis í dag þar sem Þorgeir og félagar spurðu hlustendur hvort þeim þætti eðlilegt að Íslendingar mótmæltu fyrir utan heimili Þorgerðar Katrínar og þeirra hjóna. Nánast öllum sem hringdu inn fannst það bara mjög eðlilegt miðað við stöðu mála í dag. Ég hefði sennilega ekki sagt þetta fyrir tveimur árum…en mér finnst það bara í góðu lagi líka.
Follow