Mér finnst það orðið frekar ósanngjarnt gagnvart Vodafone að láta þá tróna hér á toppi klósetts vikunnar hverja vikuna á fætur annarri. Ég set því þessa klausu efst þar til næsta klósett finnst. Vodafone bæði leiðrétti misgjörðir sínar og eigandinn, Teymi, varð gjaldþrota. Fáar klósett-tilnefningar upp á síðkastið skrifast hins vegar ekki á pennaleti heldur er skýringin einfaldlega sú að söluaðilar varnings og þjónustu hafa ekki verið með nein sérstök leiðindi við mig eða mína nýlega. Reyndar gengur það svo rækilega í hina áttina að ég nýt einstaklega góðrar þjónustu hvar sem ég kem. Þetta er auðvitað jákvætt og sýnir svo ekki verður um villst hve víðlesið vefsetur atlisteinn.is er orðið. Nú í síðustu netumferðarskýrslu frá Miðneti, mínum frábæra þjónustuaðila, kom meira segja í ljós að síðan á sér einn lesanda í Serbíu og Ísrael kom nýtt inn fyrir nokkrum vikum með einn gest (væntanlega Benjamin Netanyahu sem þekktur er fyrir þægilegheit í garð nágranna sinna).
Follow