Hvað sem sagt verður um Norðmenn verður það ekki tekið af þeim að þeir kunna að halda þjóðhátíðardag sinn hátíðlegan. Maður skammast sín hálfpartinn fyrir þynnkukennt pylsuát niðri í bæ 17. júní þar sem þjóðerniskennd er sennilega aftast á listanum yfir gildi í boði (enda undir þ svo það er kannski engin furða). Ég skrifaði í síðasta pistli um þjóðbúninginn bunad sem hér tíðkast. Skemmst er frá því að segja að varla sáum við nokkurn mann í miðbæ Stafangurs í dag sem var ekki annaðhvort í þjóðbúningi eða bar hans einhver merki, hið minnsta einhverja útgáfu af hinum rauð-, blá-hvíta þjóðfána Norðmanna. Hér er til siðs að heilsa með orðalaginu gratulerer med dagen á þjóðhátíðardaginn, sem sagt eins og viðkomandi ætti afmæli. Sérstakt. (MYND: Allt á suðupunkti á Hansen Hjørnet í dag, ungmennafélagsandinn í fyrirrúmi ásamt snyrtimennskunni.)
Þá kom partýstemmningin á óvart hjá annars tiltölulega kirkjuræknu og hófsömu þjóðfélagi, hér voru menn og konur að þamba brennivín á hverju horni eins og enginn væri morgundagurinn…eða að minnsta kosti eins og hann væri ekki þriðjudagur. Það leiðir hugann reyndar að frídögum. Norðmenn voru svo sniðugir að fá sér stjórnarskrá um miðjan maí árið 1814. Sé almanakið þeim hagstætt getur þetta leitt til tveggja þriggja daga helga í röð eins og einmitt gerist núna í ár.
Í dag er mánudagsfrí og næsta helgi er hvítasunnuhelgi, sem sagt önnur þriggja daga helgi. Þetta er erfitt á Íslandi samkvæmt mínum bókum. Við vorum að reyna að reikna það út yfir kvöldverði áðan hvort Íslendingar gætu fengið annan í páskum og 1. maí sem tvo mánudaga í röð. Sennilega er það hægt en ég man ekki eftir að það hafi gerst á minni tíð. Muni ég páskareglur rétt getur páskadagur komið upp tímabilið 22. mars til 25. apríl. Annar í páskum getur sem sagt síðast orðið 26. apríl sem táknar að 1. maí gæti orðið næsti mánudagur á eftir öðrum í páskum. Má ég vinsamlegast panta svoleiðis ár, það er ómögulegt að Norðmenn fái að skjóta okkur ref fyrir rass í mánudagsfríum!
Merkileg forræðishyggja á börum hér í Stafangri er að bannað er að panta sér tvöfaldan drykk af sterku áfengi. Ja, auðvitað máttu svo sem panta hann en þú færð hann ekki. Einfaldur í einu er hámarkið og vit þar með haft fyrir byttum. Ætli maður að fara í kringum þetta getur maður hins vegar auðveldlega keypt staup samhliða einfalda drykknum en ekki tæma staupið ofan í glasið að barþjónum ásjáandi, þá er voðinn vís (þetta síðasta er byggt á frásögn Íslendings hér, hef ekki prófað enn þá sjálfur en verð eiginlega að gera það í nafni rannsóknarhagsmuna).
Við enduðum rölt okkar í dag á barnum Hansen Hjørnet við Skagen í miðbæ Stafangurs. Þarna hélt þetta líka hressa dúó uppi stemmningunni, skrýtt þjóðbúningum og hellti ofan í sig brennivíni á við þrjár togaraáhafnir. Sjá magnaða útgáfu þeirra af Break on Through með Doors hér. Ekki skemmdi blessuð sólin sem skein í heiði og sá magnaði kokkteill þjóðbúninga og afleiðna af þeim, sem þarna gat að líta í aftanskininu, gaf yfirbragð sjúkra ævintýra, ölvunar og skandinavískrar þjóðernishyggju…held ég. (MYND: Um þetta snýst metnaður Norðmanna 17. maí, bunad!)
Á morgun tekur alvara lífsins við, þó ekki vinna, hún hefst sem betur fer ekki fyrr en um mánaðamótin. Á morgun þarf hins vegar að heimsækja Norsk arbeids- og velferdsetaten (eins konar félags- og atvinnumálaráðuneyti) svo frúin geti gengið frá atvinnuleysisbótum þar til hún byrjar að vinna þremur vikum á eftir mér, finna reiðhjól á ekki of brjálæðislegu verði, andskotast í ræktina og hefja mjög hæga U-beygju frá hroðalegu líferni síðustu 10 vikna og síðast en ekki síst ganga frá tímasetningu atvinnuviðtals hjá öryggis- og veitingaþjónustunni PSS (sem Íslendingur mun ég aldrei sætta mig við að vinna bara frá 07 – 14 virka daga, hvað á ég að gera eftir það, spila golf?!?).
Á stefnuskránni er svo að koma upp sérstakri myndasíðu í tengslum við þessa síðu, þarf að fá ráðgjöf um það hjá Ríkharði Miðnetssérfræðingi. Full ástæða er til að deila mun fleiri myndum með lesendum en þeim fáu sem mér er kleift að birta hér.
Í bili vísa ég á Facebook-síðu konu minnar, Rósu Lindar Björnsdóttur, þar er rjóminn af þeim myndum sem við höfum tekið hér fram að þessu. Endanleg myndalausn er þó handan hornsins, hægt þarf að vera að sjá mig grennast í beinni eftir að ég byrja að hjóla, lyfta og æfa tae kwon do nú á næstu dögum. (MYND: Þetta gengi hélt svoleiðis uppi keyrslunni, bendi á myndband sem hlekkjað er á hér á síðunni.)
Að lokum bendi ég á að Whitney Houston verður með tónleika hér í borginni 6. júní! Miða má nálgast á Billettservice.no. Sjáumst á ballinu kl. 01 (þetta er ekki UK-17 auglýsing).
Follow