Eftir að hafa horft á hina hroðalegu spennumynd Ríkisútvarpsins, Hamarinn, tvo sunnudaga í röð veit ég ekki úr hverju ég ætti frekar að deyja; leiðindum eða hugmyndaþurrð. Í fyrsta lagi eru öll samtöl í þáttunum svo illa skrifuð að hvaða ófermt barn sem er skynjar að hvorki samstarfsfólk í löggæslu né nokkurri annarri starfsgrein myndi ræða saman á svona loftkenndum nótum (kannski Alþingi myndi ná þessu en jafnvel eftir að hafa hlustað á jómfrúarræðu hæstvirsts varaþingmanns Samfylkingarinnar frá því í apríl í fyrra sem sjá má hér er mér það hreinlega til efs að handrit Hamarsins hafi verið slegið út). (MYND: Hamarganga þeirra félaga í Pink Floyd úr kvikmyndinni The Wall sem RÚV væri hollara að taka til sýningar frekar en Hamarinn.)
Áhrifamiklar þagnir þóttu einu sinni skrautfjöðrin í hatta allra leikstjóra og handritshöfunda en þegar þögnin er farin að verða svo vandræðaleg að rjúfa þarf hana með hringingu farsíma er flestu eðlilegu fólki nóg boðið. Einkum þegar símtalið er ekki dýpra en
„Ha, já, nú er það…ókey ég kem strax.
“ Og svo fer viðkomandi ekki einu sinni strax af stað þrátt fyrir loforðið.
Gömlu góðu Derrick-þættirnir skáka Hamrinum svo auðveldlega að við sjálft liggur að maður fyllist þýskri þjóðrækniskennd. Derrick og hinn smávaxni aðstoðarmaður hans, Harry Klein, gátu þó kennt manni nokkur orð og setningar hinnar göfugu háþýsku en Hamarinn hefur enn ekki fært mér nokkra vitneskju að viti aðra en þá að það er alveg ljóst hvaða bifreiðaumboð styrkir gerð þáttanna.
Ég er ekki með Stöð 2 svo ég veit ekkert hvernig helsta keppinauti Hamarsins, Fangavakt Stöðvar 2, vegnar í samanburðinum. Sennilega kemst ég aldrei að því. En ég leyfi mér að biðla því til Páls Magnússonar ríkisútvarpsstjóra að fyrst hann fékk það í gegn að mergsjúga landsmenn með skattpíningu í stað afnotagjalda standi hann þó að minnsta kosti undir því lögbundna hlutverki sínu að vera menningarlegt útvarp allra landsmanna. Því held ég að ég tali og skrifi fyrir munn og penna margra þegar ég bið um dönskukennsluþættina Hildi og þýskukennsluþættina Derrick aftur og það án frekari tafa…á eftir Stundinni okkar á sunnudögum og fréttum á þriðjudögum.
Nú þegar í stað, Páll.
Follow