Strength Training Anatomy eftir Frakkann Frédéric Delavier er ítarleg leiðbeiningabók um líkamsrækt með lóðum sem ég get ekki látið hjá líða að dásama hér. Delavier er fyrrum ritstjóri PowerMag í Frakklandi en starfar nú sem blaðamaður hjá Le Monde de Muscle og hefur augljóslega marga fjöruna sopið í massabransanum.
Þær eru ófáar líkamsræktarbækurnar og -blöðin sem ég hef leitað fróðleiks í þau 22 ár sem ég hef glímt við stálið í átta líkamsræktarstöðvum (lengst af hjá Birni Leifssyni í World Class) en hvergi hef ég fundið svo margslunginn fróðleik og gagnlegan sem í bók Delaviers. Í sjö köflum fer hann kerfisbundið yfir alla vöðvahópa og tínir til fjölda æfinga í hverjum kafla. Vendilega er farið yfir ólíka virkni mismunandi æfinga á ólíka hluta hvers vöðva og skýrt með nákvæmni skurðlæknisins hvar átakið lendir með því að gera sömu æfingu í mismunandi útfærslum, þröngt eða vítt grip, mismunandi fótastaða, hallandi eða flatur bekkur og svo framvegis.
Það sem gerir efnistökin einstök er sérstök meiðslaumfjöllun í þeim köflum sem fjalla um vöðva eða líkamshluta sem auðvelt er að tjóna með því að framkvæma einstakar æfingar vitlaust. Kaflar um axla- og bakmeiðsli eru mjög greinargóðir og ítarlega útskýrt hvernig meiðsli koma til og eins hvað gera megi til að draga úr líkum á þeim.
Fjöldi stórglæsilegra skýringarmynda fylgir umfjölluninni og teiknar Delavier þær sjálfur auk þess að skrifa bókina svo manninum er auðsjáanlega ýmislegt til lista lagt. Öll vöðvaheiti eru á latínu sem er skemmtilegt þar sem gaman er að luma á fróðleik um hvar til dæmis flexor digitorum superficialis eða serratus anterior eru niður komnir.
Delavier sýnir og útskýrir 115 mismunandi æfingar í bókinni og ég hef endalaust getað sótt mér andagift í hana síðan hún rataði í mínar hendur í vor. Óhætt er að segja að fróðleikurinn hafi haft töluverð áhrif á mínar æfingar og ýmsu hef ég breytt þar til batnaðar eftir að ég fór að fletta upp í Strength Training Anatomy. Þetta er sem sagt dúndurgripur og fæst hjá honum Ægi vini mínum í Vaxtarvörum.
Follow