Í dag, þriðjudaginn 4. ágúst, er formlega fyrsti dagur sumarfrís ársins 2009 hjá okkur. Það væri rætin lygi ef ég héldi því fram að þessa hefði ekki verið beðið með eftirvæntingu í allt sumar. Margir spyrja mig hvað ég sé að þvælast í sumarfrí svona seint en það er einmitt þungamiðjan í þeirri nautn sem sumarfríið veitir mér. Nautnafrestun (e. delayed gratification) er fyrirbæri sem margfaldar alla góða hluti. Það að bíða eftir sumarfríinu í allt sumar gerir fríið að miklu meira en fríi, það gerir það að hreinni endurfæðingu. Hvað er indælla en að vera að fara í frí þegar allir vinnufélagarnir eru að koma úr fríi? (MYND: Þessi mynd er tekin í júlí 2007 í sumarbústað föður míns og konu hans í Svínadal. Það verður að segjast að hún er ótrúlega 2007. Meðan allt lék í lyndi!)
Þá er einnig gott að vera búinn að þrauka gegnum sumargúrkuna svokölluðu sem bandarískir fjölmiðlamenn kalla silly season. Þetta er tímabilið sem flest þjóðfélög nánast stöðvast vegna sumarfría og ekki rassgat er í fréttum. Það getur verið hvort tveggja leiðinlegt og skemmtilegt að vera blaðamaður á þessu tímabili. Leiðinlegt vegna þess að maður er oft í stökustu vandræðum með að kreista fram fimm mínútna fréttatíma fyrir morgunfréttir Bylgjunnar klukkan sjö. Skemmtilegt vegna þess að maður getur leyft sér mun meira í hressandi fréttum um að kona hafi komið 34 vinnufélögum á sjúkrahús með lélegu ilmvatni eða að ítalskt veitingahús hafi rukkað japönsk hjón um 130.000 kall fyrir humar og verið lokað í kjölfarið.
Gunnar Reynir Valþórsson blaðamaður hleypur í skarðið fyrir mig á meðan ég er í burtu og ég efast ekki um að þeir Gissur Sigurðsson sjái þjóðinni fyrir öllu því sem hún þarf á að halda í síkólnandi morgunsárið. Nú er nefnilega farið að hausta aftur og eins gott fyrir mig að hvílast vel í fríinu þar sem í ágústlok skellur á mér vinna og síðara árið í meistaranámi í blaðamennsku. Samhliða þessu mun ég sennilega leggja stund á nám í köfun við Köfunarskóla Íslands svo ég standi nú að einhverju leyti betur að vígi þegar við flytjum héðan af landi brott næsta sumar og gefum skít í Icesave og annað rugl sem er að sökkva Íslandi.
En hvað á að gera í sumarfríinu? Eldsnemma á fimmtudag leggjum við upp héðan og verðum í Stykkishólmi klukkan 08:30. Þaðan tökum við hinn nafntogaða Baldur til Flateyjar og eigum nótt á hótelinu þar, sem býður af sér góðan þokka miðað við hvað lesa má á lýðnetinu. Daginn eftir siglum við áfram til Brjánslækjar og ökum þaðan í striklotu til Dalvíkur. Þar eigum við heimboð hjá snillingunum og vinnufélögum mínum Svanhildi Hólm Valsdóttur og Loga B. Eiðssyni í fiskisúpu á hinu svokallaða fiskisúpukvöldi. Daginn eftir upplifum við í fyrsta sinn Fiskidaginn mikla á Dalvík og lifum í vellystingum hjá Úlfari Eysteinssyni, yfirmatreiðslumeistara hátíðarinnar. Á sunnudegi er ekið frá Dalvík áleiðis til Akureyrar þar sem væntanlega verður tekin ein nótt og að sjálfsögðu snætt á Bautanum. Gamli smiðjuborgarinn verður að líkindum fyrir valinu.
Þá má búast við einni nótt á Mývatni og annarri í Hallormsstaðaskógi (e. Leaning Worm Forest) en á miðvikudeginum komum við á ný til sælureitsins Reyðarfjarðar þar sem Ásgeir og Jóna Dís, okkar frábæru gestgjafar síðan um hvítasunnuhelgina, taka við okkur á ný. Þar verður auðvitað engin miskunn sýnd í drykkjunni og hvítasunnuhelgarpakkinn endurtekinn að einhverju leyti. Þá má geta þess að keppnin Austfjarðatröllið hefst einmitt á meðan við dveljum í bænum svo ég geri ráð fyrir að keppa í dvergakasti og glasalyftu sem hvort tveggja eru ævafornar greinar.
Verði ég ekki kominn inn á meðferðarstofnanir að þessu loknu er ein nótt ráðgerð í Skaftafelli og sennilega ein á heilsuhælinu í Hveragerði eða á Vogi ef ég kemst þá svo langt. Sem sagt, dúndursumarfrí fram undan og ekkert gefið eftir í að velja íslenskt og ferðast innanlands. Lesendur atlisteinn.is, sem nú skipta þúsundum og tengjast síðunni frá níu þjóðlöndum, eru sem sagt beðnir velvirðingar á því að þetta verður sennilega síðasti pistillinn í bráð vegna sumarfría en fastlega er gert ráð fyrir að öflug þjóðmálaumræða rísi hér á ný kringum 18. ágúst. Show no Mercy!!!
Follow